Biller vum Juegdschlass a ronderëm

Jiddereen de bei ons op d’Juegdschlass kënnt, huet um Heemwee ganz vill Biller am Kapp: Sief et d’Faarwen an d’Formen vun der eenzegaarteger Nature, ronderëm d’Juegdschlass, déi grandios Aussiicht vun onser Terrass oder déi pittoresk Detailer, déi d’Ariichtung vum Restaurant Juegdschlass ausmaachen.

Op dëser Säit gi mir Iech en ‘Avant-gôut’ vun dem wat Iech um Juegdschlass erwaart.

Ons Bisonen

Säit ville Joer gehéieren ons Bisoen zum Juegdschlass. Si liewen d’ganzt Joer dobaussen op hirer riseger Koppel, ganz no beim Juegdschlass. Eng eemoleg Geleeënheet dës eenzegaarteg Déieren a fräier Natur ze gesinn an ze fotograféieren!

Ons Pohunnen

De Pohunn ass d’Symbol vum Juegdschlass – dofir hu mir dëst herrlecht Déier viru Joren an onse Logo iwwerholl.
Sengem typesche Gesang nozelauschteren a säin aussergewéinlecht Plommekleed ze bewonnere gëtt een einfach net midd.
Leider huet sech fir de Moment onse Bestand opgeléist – Een anere Bëschbewunner huet och grousse Gefalen un hinne fonnt.

Onse Pol

Säit Kuerzem gëtt am Bësch ronderëm d’Juegdschlass, och am Gaart an esou guer schonns e puer Mol am Haus selwer reegelméisseg e klénge ‘Männche’ gesinn. Hien wier, wéi Zeien ons soten immens séier a wéinst senger klenger Gréisst schwéier ze entdecken. De Siichtungen no gesäit hien aus wéi eng lieweg Eechel an huet och genee déi Gréisst.
Wéi et ausgesäit huet dat kléngt Bëschwiesen d’Juegdschlass zu sengem Heem gewielt.Mir hunn hien ‘Pol’ genannt.

Vläicht gesitt dir jo och dat eent oder anert Mol de ‘Pol’ vum Juegdschlass – et lount sech op alle Fall ganz genee ze kucken…

Ons Billergallerie